Богдановмыт ешыште усталык шӱлыш озалана. Озавате, Наталья Геннадьевна, И.С.Палантай лӱмеш тӱвыра да сымыктыш колледжыште мурызылан тунем лектын. Латкум ий тӱвыра аланыште тыршен. Кызыт Йошкар-Оласе ик фабрикыште пашам ышта. Яра жапыште Кугунур тӱвыра пӧрт пеленысе «Какшан сем» ансамбльышке коштеш. Шкенжынат ятыр мурыжо уло. Суртоза, Алексей Владимирович, вневедомственный охраныште тырша. Семтӱнялан шӱман огыл гынат, пелашыжын мурымыжым кумылын колыштеш. Ешыште ик пайремат марий муро деч посна огеш эрте.
Усталык шӱлышан авам ончен, ӱдыржӧ-влак тыгаяк кушкыт. Диана Кугунур школын 8-ше классыштыже тунемеш, Ксю-ша – 5-шыште. Коктынат йочасад гычак мураш-кушташ кумылан улыт, «Шонанпыл» ансамбльышке коштыт. Диана книгам лудаш йӧрата.
– Психологий дене кылдалтше книга-влакым утларак шергалам. Мый, еҥ-шамычын тарванылмыштым, ончалтышыштым эскерен, койыш-шоктышыштым пален налнем, – ойла ӱдыр.
Тылеч посна Диана сылнымутан произведенийым сылнын лудаш кумылан. Шкетан, Колумб лудмашлаште мастарлыкшым ончыкта да сеҥышыш лектеш. Ончыкылык илышыжым йот йылме дене кылдынеже, садлан англичан йылмым келгын тунемеш.
Ксюша бисер гыч тӱрлӧ арверым ямдыла, кӱчым моторын чиялташ тунемеш. Тӱрлӧ йодышым лончылен, шымлыме пашам воза. Марий тӱрым, коваже Лидия Николаевна Кудрявцеван почеламутшо-влакым шымлен. «Я познаю мир» районысо конкурсышто ик гана веле огыл сеҥышыш лектын.
– Йоча-влакым марий шӱлышаным куштена. Мӧҥгыштӧ марла гына кутырена, марий кочкышым ямдылена, марий тувырым чияш йӧратена. Кова-влак пидаш, марий тӱрым тӱрлаш туныктат, – ойла Наталья Геннадьевна.
Богдановмыт Марий Элын сӧрал верлашкыже лектын кошташ йӧратат. Мӱшылъерыште, республикын тӱрлӧ районысо памашлаштыже, Козьмодемьянскысе тоштерыште лийыныт. 2019 ийыште Крымыште каненыт. Кастене чӱчкыдын глобус йыр погынат. Чонлан келшыше олам да элым ойырат. Ончыкыжым Италийышке, Турцийышке каяш шонат.
– Еш – илышын тӱҥжӧ. Вашумылымашым, пагалымашым эн кугу пиаллан да сеҥымашлан шотлена, – ойлат вате-марий.
