Теле пагыт юзо шӱлышан. Южгунам пӱртӱсыштӧ улмо годым йомак тӱняш логалмыла чучеш. А кунам йомакысе герой-влакым кучен ончаш лиеш – тидыже нимо дене таҥастараш лийдыме куан. Медведево район Аксарка ялыште илыше А.В.Гурьянован суртшым нигӧ эртен огеш кай. Капка ончылныжо шке кид дене ыштен шогалтыме лум мӧчӧр-влак, Йӱштӧ Кугыза ден Лумӱдыр, дракон пуйто кажныжын лишеммыжым вучат.
– Лум гыч фигур-влакым кокымшо ий ыштем. Ик йомак персонажым ненчаш 2-3 шагат кӱлеш. Сӧрастараш, чиялташ пелашем ден ӱдырем полшат. Тиде паша чонемлан келша, куаным конда, – ойла мастар кидан Алина Валерьяновна.
Озавате деке унала толшо София Ионовам (снимкыште) дракон ӧрыктарен. Тудын шонымыж почеш ты янлык кугу да шучко. А теве лум гычын ненчыме дракон ӱдырлан моткоч порын чучын.
