М.Шкетан лӱмеш Марий национальный драме театрыште 29 ноябрьыште «Салика» спектакльым 900-шӧ гана ончыктат. Кылме тылзын 19 кечынже спектакльым тӱрлӧ ийыште шындыше режиссёр-влак В.А.Пектеев, В.В.Домрачев, Р.Ю.Алексеев да Саликам модшо артист-влак дене пресс-конференций эртаралтын. «Салика» чылаже латкок гана уэш шындалтын, тушто тӱҥ героиньым 18 актрисе модын. Вашлиймашыш пытартыш ийласе Салика-влак толыныт (снимкыште). Нуно кӧргӧ шижмашышт, шарнымашеш кодшо оҥай историй-влак нерген порын шарналтеныт.
Пьесым марий писатель-драматург С.Н.Николаев 1930 ий кыдалне возен. Тунам тудо «Полатовын сӱанже» маналтын. 1938 ийыште «Cалика» пьесе Шкетан театрын репертуарыш музыкальный комедий семын пурен. Икымше режиссёр А.И.Маюк-Егоров лийын. Таче мартеат «Салика» театрын репертуарыштыже ик эн тӱҥ верым налеш да марий калыкын ик эн йӧратыме спектакльлжылан шотлалтеш.
Е.ИВАНОВА.
