Марий Турек район Сардаял школ «Школа позитивных привычек» проектын инновационный площадкыжлан шотлалтеш. Туныктышо-влак йоча-шамычым поро пашам ышташ туныктат. У проект-влакым возат да илышыш шыҥдарат. Иктыже – «Ару ял» (авторжо – туныктышо-организатор О.А.Семёнова). Тиде проект «Образ жизни» поро кумылым ончыктышо фондын эртарыме конкурсыштыжо икымше верыш лектын. Тушко Российысе 14 школ ушнен.
– Проект почеш уло школ пашам ыштен, поснак – 5-8-ше класслаште тунемше-влак. Эн ончыч ӱдыр-рвезе-влак ял калыклан пайдале ой-каҥашан буклет-шамычым ямдыленыт да пуэденыт, пырдыжгазетым луктыныт. Вара шӱкым кышкыме верлам эрыктеныт. Тыгай акцийла самырык-влакым гына огыл, кугыеҥ-шамычымат пӱртӱсым аралаш туныктат, шонена. Кеч-могай йодышым пырля каҥашет да пашашке тӱшкан ушнет гын веле лектыш лиеш, – ойла директорын воспитаний паша шотышто алмаштышыже Г.В.Минимуллина.
