– Мыланем Сергей Есенин ден Владимир Маяковскийын возымышт келша. Нунын почеламутышт-влак чонеш логалше улыт. Сылнымутан произведенийла деч посна психологий дене кылдалтше книга-влакым лудам. Мый, еҥ-шамычын тарванылмыштым, ончалтышыштым эскерен, койыш-шоктышыштым пален налнем. Книга – тиде шонымаш пуш. Тудо тӱрлӧ жапыш да тӱрлӧ кундемыш наҥгая, – ойла Оршанке районысо Кугунур школын 8-ше классыштыже тунемше Диана БОГДАНОВА.
Кызыт Интернетыште йӱкаҥдыме проиведенийлам вашлийына. Нуным колышташ да текстшым экраныште ужаш лиеш. Ӱдыр тыге англичан книга-влакым колыштеш да лудеш.
Дианан сеҥымашыже ятыр. Районышто эртаралтше Шкетан лудмаште мыскарам лудмо дене 1-ше верыш лектын. Колумб лудмашке кажне ийын ушна да сеҥыше радамыш логалеш.
