– Ме йоча-влак дене «Ямде лийым» куанен лудына. Газет кугыеҥ-влакланат пеш пайдале. Тушто марий йӱла, тӱвыра дене кылдалтше ятыр увер савыкталтеш. Поснак марий калык пайрем сценарий-влакым вучена. Ме «Шорыкйол», «Кугече» да моло пайремым пайремлена. Ончыкыжым «Поэзий аршаш» мероприятийым чӱчкыдынрак эртараш шонена. Тидлан «Ямде лий» газетеш савыкталтше почеламут-влак полшат. Газет – йолташ да полышкалыше, – ойла Одо кундем Карагӧл район Ныргындыш ялысе йочасадыште калык тӱвыра дене ешартыш шинчымашым пуышо туныктышо Надежда Михайловна.
Йочасадыште ий мучко марий шӱлыш озалана. Тыште тӱрлӧ теме дене район фестивальым ий еда эртарат: «Мотор ӱдыр, чевер каче», «Еш – пиал», «Калык йомак», «Калыкемын модышыжо» да молат. Моло йочасад-влакат кумылын ушнат.
– Марий кундем деч тораште илена гынат, марий йылмынам огына мондо. Йоча-влакын шӱмышкышт изинек уржа пырчым ӱдет гын, кушкын шумекышт, лектыш лиеш, – иктешла Н.М.Иванова.
